Китаптан асқан ҳешқандай даналық жоқ. Ал китаплардың ўатаны болса – китапхана. Китапхана – ағартыўшылық орны, инсанның руўхый дем алатуғын, тәрбия алатуғын муқаддес орны есапланады. Китапхана – дүньядағы ең ақыллы адамлардың жыйналатуғын орны есапланады. Дүньяда әдеттегиден өзгеше архитектуралық үлгиде салынған китапханалар ҳаққында еситтиңиз бе?
Канзас-Сити, АҚШ
2004-жылы Канзас-Ситидеги Жәмийетлик китапхана босап жатырған Биринши миллий банк имаратына көширилди. Еки жылдан соң усы имарат жанында автомашиналар туратуғын орын қурылды. Бул болса китапхана жумысларына кесент етти. Буның шешими сыпатында архитекторлар китап үлгисиндеги үлкен дийўал қурып, автомашиналар туратуғын орынды китапханаға көринбейтуғын етти. Дийўалдағы ҳәр бир китаптың бийиклиги – 8 метр, ени – 2 метрди қурайды. Китапларға дүньяға белгили классиклердиң атлары жазылған. Ал китапхананың ишки қурылысы бурынғы банктиң үлгиси менен қалды.
Pargue Espana, Колумбия
Колумбияның Меделин қаласы өткен жүз жыллықтың ең патас ҳәм нәшебентлик затлар жетистиретуғын топарлар қаласы сыпатында есте қалған еди. Жергиликли ҳәкимият бул түсиникти сапластырыў ушын қалада мәдений қурылыс баслаўды режелестирди. 2007-жылы Джанкарло Маззантидиң жойбары тийкарында Меделин қаласында Pargue Espana китапханасы бой тикледи. Китапхананың өзгешелиги оның қурылысында. Жартас формасында қурылған имарат ишине адамлар китап оқыўға келеди.
Луи Нюсера, Франция
Дүньядағы қурылысы жағынан ең өзгеше китапхана Францияда жайласқан. Ивом Байяром ҳәм Франсисом Шапюлердиң жойбары тийкарында қурылған бул китапхана 2002-жылы қурылған. Китапхананың өзгешелиги адамның жарты басы ҳәм бас мийи формасында қурылған.
Сандро Пенн атындағы китапхана, Италия
![](\"http://img.uz/d/2017/11/5a0aa6dcf4047.jpg\")
«Жерге басқа планеталылар келипти!» деген гәпти Италияның Перудже қаласына барсаңыз ғана айта аласыз. Себеби, бул жердеги Сандро Пенн атындағы китапхана басқа планеталылардың ҳаўа кемеси формасында қурылған.
