Быйылғы жылы да әдеттегидей 1-класс оқыўшылары ушын «Президент саўғасы» тапсырылады. Бул ҳаққында ӨзА хабар берди.
Арнаўлы комиссияның қарарына муўапық, пандемия шараятын есапқа алып мектеплерде жаңа оқыў жылының биринши күни 14-сентябрь етип белгиленди. Мектеплерде усы күни 650 мыңға шамалас оқыўшыға «Президент саўғасы» тапсырылыўы жобаластырылған.
1-класс оқыўшыларына берилетуғын «Президент саўғасы» қурамынан 12 түрдеги оқыў қураллары, соның ишинде, портфель, дәптерлер, сүўрет дәптери, акварель бояўлары, реңли қағаз, қәлем қутысы, шарикли ручка, реңли ҳәм әпиўайы қәлемлер, пластилин, желим ҳәм өширгиш орын алған.
Сондай-ақ, хабарда жазылыўынша, «Президент саўғасы» оқыўдың дәстүрий ямаса аралықтан оқытыў түрин сайлаўына қарамастан, барлық оқыўшыларға бериледи. Бунда «Президент саўғасы» аралықтан оқыўды мақул көрген 1-класс оқыўшыларының ата-аналарына тапсырылады.
Ислам Матеков.
Сайтымыздың телеграмдағы каналына ағза болың: https://t.me/karinformuz
