«Makan.uz» сайтының Телеграм каналында Нөкис қаласы А.Шамуратова көшесинде жайласқан электр бағанасы Агробанк имараты жанында турған автомобиль үстине қулап түскенлиги, сондай-ақ, Нөкис қалалық салық инспекциясының имаратына да зыян жеткенлиги ҳаққында мағлыўмат жәрияланған еди.
Бул бойынша Қарақалпақстан Республикасы Бәнтлик ҳәм мийнет қатнасықлары министрлигиниң Мәмлекетлик мийнет инспекциясы тәрепинен Өзбекстан Республикасы «Мийнетти қорғаў ҳаққында»ғы нызамына тийкар ўақыя орнына барып, үйрениў жумыслары алып барылды.
Министрлик мәлимлеме хызметиниң хабар бериўинше, Нөкис қаласы А.Шамуратова көшесинде жайласқан «Үй-жай қурылыс» ЖШЖ тәрепинен салынып атырған 16 этажлы имаратта 2021-жыл 30-апрель күни имаратқа қурылған лесаны жыйнаў мақсетинде жумыс алып барылып атырғанда жүк көтериўши кран тәрепинен ҳәм сол жердеги бригадирлердиң жол қойған қәте-кемшиликлери ақыбетинде леса жерге қулап түсип, алдындағы көшедеги электр сымына урылған. Ақыбетинде электр бағанасы қулап, сол жерде турған Нөкис қалалық мәмлекетлик салық инспекциясы имараты ҳәм «Cobalt» маркалы автокөлигине зыян жеткерилген.
Үйрениў жумыслары даўамында техникалық қәўипсизлик бойынша бир қатар кемшиликлер анықланып, Қарақалпақстан Республикасы Бәнтлик ҳәм мийнет қатнасықлары министрлигиниң Мәмлекетлик мийнет инспекциясы тәрепинен кемшиликлерди сапластырыў бойынша үш күн мүддетли жазба көрсетпе берилген.
Сайтымыздың телеграмдағы каналына ағза болың: https://t.me/karinformuz
