12-июнь күни саат 06:00 шамасында Нөкис қаласы С.Камалов көшесинде жайласқан еки этажлы «Neo» рестораны имаратында газ ҳәм ҳаўа араласпасының жарылыўы келип шыққан. Бул ҳаққында Қарақалпақстан Республикасы Айрықша жағдайлар басқармасы хабар берди.
Ўақыя орнына Қарақалпақстан Республикасы Айрықша жағдайлар басқармасы Нөкис қалалық АЖБдан 2 өрт-қутқарыў экипажы жетип барған.
Дәслепки мағлыўматларға қарағанда жарылыў имараттың екинши этажында жайласқан асханада келип шыққан. Ўақыя ақыбетинде имарат зыянланған. Ўақыя бойынша дене жарақатын алғанлар ҳәм қайтыс болғанлар жоқ (жарылыў ўақтында имаратта тек қараўыл болған, бирақ зыянланбаған).
Сорастырыў жумыслары даўамында материаллық зыян анықланады. Ўақыя орнына Қарақалпақстан Республикасы АЖБ, Ишки ислер бөлими, прокуратура ҳәм «Тез жәрдем» хызмети жетип барған.
Сайтымыздың телеграмдағы каналына ағза болың: https://t.me/karinformuz
