Ташкент мәмлекетлик юридикалық университетине оқыўға кириўде 2023-2024-оқыў жылынан баслап тест сынақларының 2-блогы, яғный юриспруденция бакалавриат тәлим бағдарына сәйкес пәнлер бойынша тарийх пәниниң орнына ҳуқықый пәнлерди киргизиў мәселеси университет кеңесинде көрип шығылды ҳәм мақулланды.
«Ҳуқуқий ахборот» каналының жазыўынша, бул усыныстың енгизилиўи бирнеше унамлы нәтийжелерге хызмет етеди, атап айтқанда:
- мектеп жасынан баслап балаларды ҳуқықый пәнлерди терең өзлестириўге, Конституция ҳәм нызамларды пуқта үйрениўге;
- мектеплерде сапалы, халықаралық стандартларға сәйкес юридикалық сабақлықлардың жаратылыўына;
- ҳуқықтаныў пәнлеринен билим беретуғын муғаллимлерге қойылатуғын талаплардың артыўы нәтийжесинде олардың қәнигелигин турақлы түрде арттырып барыў ушын беккем тийкар жаратылады;
- Ташкент мәмлекетлик юридикалық университетине дәслепки ҳуқықый билимлерге ийе болған жас әўлад ўәкиллери кирип келиўине ерисиледи.
Мағлыўмат орнында атап өтиў керек, ҳәзирги ўақытта Ташкент мәмлекетлик юридикалық университетине оқыўға кириўде абитуриентлер 2 бөлимнен ибарат болған 5 пән комплексинен тест сынақларын тапсырады. Булар:
- 1-бөлимде барлық бағдарлар ушын мәжбүрий 3 пән – ана тили (өзбек, рус ямаса қарақалпақ тили), математика ҳәм Өзбекстан тарийхы;
- 2-бөлимде юриспруденция тәлим бағдары бойынша 2 пән – тарийх ҳәм шет тили пәнлери.
Қосымша етиў орынлы, ҳәзирги ўақытта улыўма орта билим бериў мектеплеринде 4 жыл даўамында жоқары классларда Мәмлекет ҳәм ҳуқық тийкарлары және Конституциялық ҳуқық тийкарлары пәнлери оқытып келинбекте. Мәлим етилиўинше, тест сораўлары усы сабақлықлар тийкарында дүзиледи.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
