Көпшиликтиң хабары бар, усы жылдың 24-май күни «Қубла Үстирт» миллий тәбият бағының мәмлекетлик инспекторлары тәрепинен Қоңырат районында өткерилген рейд даўамында Қоңырат районы «Жаслық» ППЖ турғынлары болған пуқаралар Р.Б. ҳәм Б.Т.лар нызамға қайшы рәўиште Өзбекстан Республикасының «Қызыл китабы»на киргизилген сүт емизиўшилер түрине киретуғын 11 бас жайранды аўлағаны анықланып, усы жағдай бойынша барлық ҳүжжетлер рәсмийлестирилип, тийисли тәртипте Арал тәбиятты қорғаў прокуратурасына өткерилген еди.
«Қубла Үстирт» миллий тәбият бағы мәлимлеме хызметиниң хабар бериўинше, прокуратура тәрепинен тергеў, сорастырыў жумыслары алып барылып, суд уйымына жиберилген. Суд процеси усы жылдың 2-ноябрь күни жуўмақланып, Жынаят ислери бойынша Қоңырат районлық суды тәрепинен ҳүким оқылды.
Ҳүким бойынша пуқара Р.Б. 4 жыл 1 ай мүддетке еркинен айрылған болса, және бир пуқара Б.Т.ға 4 жыл мүддетке еркинен айырыў жазасы тайынланды. Сондай-ақ, ҳайўанат дүньясына келтирилген улыўма 404 миллион 250 мың сумлық зыян «Қубла Үстирт» миллий тәбият бағы пайдасына өндирилиўи белгиленди.
Сайтымыздың телеграмдағы каналына ағза болың: https://t.me/karinformuz
