Усы жылдың 24-ноябрь күни саат 07:00 лерде Нөкис қаласы 22-киши районы 8/6-жай 43-квартирада ижарада жасайтуғын Нөкис мәмлекетлик педагогикалық институтының студенти Р.Р. (ер адам) үйине орнатылған жылытыў қазаны трубасынан сызып шыққан газ ийисинен зәҳәрленип қайтыс болғанлығы анықланды. Бул ҳаққында Қарақалпақстан Республикасы прокуратурасы хабар берди.
Усы жағдай бойынша марҳум Р.Р.ға суд-медициналық экспертизасы тайынланған.
Жағдай бойынша Нөкис қалалық прокуратурасы тәрепинен тергеўге шекемги тексериў ҳәрекетлери алып барылмақта.
Тексериў даўамында анықланыўынша, усы жайда сол күни марҳум Р.Р.дан тысқары 6 адам болып, марҳум Р.Р. асханада, қалған 6 адам басқа бөлмелерде уйқылағаны ушын олардың ҳеш бири газ ийисинен зәҳәрленбеген.
Тексериў ҳәрекетлери Қарақалпақстан Республикасы прокуратурасы тәрепинен қадағалаўға алынған.
Сайтымыздың телеграмдағы каналына ағза болың: https://t.me/karinformuz
