21-декабрьде күндизги ўақытта Қарақалпақстан Республикасы ҳәм Хорезм ўәлаяты, ал кешки ўақытта Өзбекстанның қубла-батыстағы басқа ўәлаятлары аймақларына Кавказ аймақларынан антициклон кирип келиўи басланады. Базы жерлерде жаўын жаўады. Ҳаўаның температурасы түнде 0-5 градус жыллы, күндиз 15-18 градус жыллы болыўы күтиледи. Ал Қарақалпақстанда 7-12 градус жыллы болады. Бул ҳаққында «Өзгидромет» хабар берди.
22-декабрьде антициклон шығысқа қарай жылжып, аймақтың көпшилик бөлегинде түнде ҳәм азанда жаўын жаўады. Таў алды ҳәм таўлы аймақларда жаўын-шашын (жаўын ҳәм қар) болады. Базы жерлерде күшли болыўы мүмкин. Өзбекстанның арқа ҳәм арқа-батыс аймақларында жаўын жаўыўы тоқтайды. Ҳаўаның температурасы түнде 4-9 градус жыллы, күндиз 10-15 градус жыллы болады.
21-22-декабрьде суўық ҳаўа кирип келиўи менен республика бойлап самал 17-22 м/с қа шекем күшейиўи күтилмекте. Бухара, Самарқанд, Жиззақ, Қашқадәрья ўәлаятларында айрым жерлерде 25-28 м/с қа шекем күшейиўи мүмкин.
23-24-декабрьде аймақлардың көпшилик бөлегинде қурғақ ҳәм салыстырмалы жыллы ҳаўа райы болыўы күтилмекте. Тек ғана Қарақалпақстан ҳәм Хорезмде ҳаўа райы және өзгереди – бул аймақларға Волгабойы аймақларынан антициклон кирип келеди. Қарақалпақстан ҳәм Хорезмде жаўын жаўады, базы жерлерде қарға айланады. Ҳаўаның температурасы түнде 0-5 градус жыллы, күндиз 23-декабрьде 8-13 градус жыллы, 24-декабрьде республика бойлап 5-10 градус жыллы болыўы күтиледи. Қарақалпақстанда болса 0-5 градусқа шекем жыллы болады.
Өзбекстан бойлап айрым жерлерде думан түсиўи мүмкин.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
