Жыл жуўмағында дәстүрий түрде республикамыз бойлап Меҳрибанлық үйлериниң тәрбияланыўшылары, ата-анасының қараўысыз қалған балалар, Ўатанымыз шегараларын қорғаў ўақтында қайтыс болған ата-аналардың балалары ушын «Президент шыршасы» илажлары өткериледи.
Нөкис халықаралық аэропортында Қарақалпақстанға жиберилген 709 дана «Президент саўғасы» күтип алынды. Бул ҳаққында ҚР Халық билимлендириў министрлиги хабар берди.
12 жасқа шекемги балалар ушын таярланған «Президент саўғасы» қурамына мазалы затлар, оқыў қураллары ҳәм балалар энциклопедиясынан ибарат 21 түрдеги саўғалар киргизилген.
Сондай-ақ, быйылғы жылы Меҳрибанлық үйлери, Балалар қалашалары, Шаңарақлық балалар үйлери және SOS балалар мәҳәллелериниң 12 жастан үлкен болған тәрбияланыўшылары ушын заманагөй планшетлер де саўғалар қурамына киргизилди.
Өзбекстан Республикасы Президентиниң байрам қутлықлаўы ҳәм саўғалары аймақлық ҳәкимликлер қатнасыўында өткерилетуғын «Президент шыршасы» илажларында балаларға салтанатлы түрде тапсырылады.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
