Бердақ атындағы Қарақалпақ мәмлекетлик университети жаслар аўқамы волонтёрлары ҳәм жетекшилери менен биргеликте жаңа жыл байрамы қарсаңында социаллық жәрдемге мүтәж, кем тәмийинленген шаңарақлардың перзентлери болған студентлер ушын саўға етиў ушын ҳәр бир факультетке қайырқомлық қутышалары орнатылды.
– Саўғалардың ишинде ең жақсысы – бул итибар, шийрин сөз ҳәм ғамқорлық, - дейди ҚМУ жаслар аўқамы жетекшиси Дәўранбек Абаданов. – «Саўап исти ҳәр ким, ҳәр күни ислеўи керек» деген ҳикметли сөзден келип шығып өткерилген қайырқомлық акциясында бир ай даўамында улыўма 20 миллион 460 мың сум қаржы жыйналды. Жаслар аўқамы басланғыш шөлкеми тәрепинен университетимиздеги жәрдемге мүтәж студентлер үйренип шығылып, улыўма 160 студентке топланған пуллар саўға сыпатында бөлистирилди.
Байрам алдынан университет ректоры, барлық факультет жаслар аўқамы жетекшилери, кеңес ағзалары қатнасыўында бөлистирилген пуллар 127 мың сумнан конвертлерге жайластырылып, университет студентлери атынан жаңа жыл саўғасы ретинде өз ийелерине жеткерилди.
«Ўақыт өте береди, инсанның изинде тек жақсы сөз ҳәм жақсы ислери калады. Усы пурсаттан пайдаланып қайырқомлық акциясында қатнасқан барлық студентлерге, белсендилерге, шөлкемлестириўшилерге өз миннетдаршылығымызды билдиремиз», - дейди ҚМУ жаслар жетекшиси.
Karinform.uz.
Сайтымыздың телеграмдағы каналына ағза болың: https://t.me/karinformuz
