Өзбекстан Республикасы Сыртқы ислер министри Абдулазиз Камилов Олий Мажлис Сенатының XXIV жалпы мәжилисинде Өзбекстанның Украинада жүз берип атырған ўақыяларға мүнәсибетин мәлим етти.
«Бириншиден, Украина әтирапындағы жағдай Өзбекстанда үлкен қәўетерлениў оятпақта. Екиншиден, Өзбекстан жағдайға тыныш жол арқалы шешим табыў ҳәм келиспеўшиликти сиясий дипломатиялық усыллар жәрдеминде шешиўдиң тәрептары. Буның ушын, биринши гезекте, әскерий ҳәрекетлер, күш ислетиўлер жедел түрде тоқтатылыўы зәрүр.
Өзбекстан тарийхтан ҳәм Россия Федерациясы менен, ҳәм Украина менен дәстүрий көп қырлы байланысларға ийе. Биз ҳәр еки мәмлекет пенен өз миллий мәплеримизден келип шыға отырып өзара мәплерге тийкарланған бирге ислесиўди даўам еттиремиз.
Биз бүгингидей аўыр күнлерде Украинаға гуманитар жәрдем беремиз ҳәм ҳәзирги аўыр жағдайды есапқа алып гуманитар жәрдем жибериўди даўам еттиремиз.
Өз гезегинде, Өзбекстан Республикасы Украинаның ғәрезсизлиги, суверенитети ҳәм аймақлық пүтинлигин тән алады. Биз Донецк ҳәм Луганск халық республикаларын тән алмаймыз», - деп айтып өтти Өзбекстан Сыртқы ислер министри.
Ислам Матеков,
Karinform.uz.
Сайтымыздың телеграмдағы каналына ағза болың: https://t.me/karinformuz
