Өзбекистан кубоги беллесиўлеринде қарақалпақ палўанлары 3-орынды ийеледи

Усы жылдың 13-14-декабрь күнлери Ташкент қаласындағы ЖАР спорт комплексинде миллий гүрес бойынша командалар арасында Өзбекистан кубоги беллесиўлери болып өтти.
Онда Өзбекистанның барлық регионлары – Қарақалпақстан Республикасы, Ташкент қаласы ҳәм барлық ўәлаятларынан жәми 14 сайланды команда қатнасты.
Беллесиўлер жуўмағына муўапық, Қарақалпақстан Республикасы сайланды командасы командалық есапта 3-орынды ийеледи.



- Өзбекистан кубоги жарысы командалық беллесиўлер формасында өткерилди. Сайланды командамыз қурамында университетимиздиң көплеген үмитли спортшы студентлери де қатнасты. Жеңимпаз болыў ушын бар күш-жигеримизди көрсетиўге ҳәрекет еттик. Республикамыз спортшыларының жақсы нәтийже көрсетиўинде университетимиз студентлериниң үлеси айрықша болды, - дейди жарыс жеңимпазы, Бердақ атындағы Қарақалпақ мәмлекетлик университетиниң магистратура бөлими дене мәденият қәнигелигиниң 2-курс магистранты Нурсулыў Бердахова.
Жарысқа спортшыларымызды тәжирийбели тренерлерден Б.Еримбетов, А.Халиков, Н.Дәнияровлар таярлады.

Ислам МАТЕКОВ.