2022-жылдың 21-октябрь күни Нөкис қаласында Республикалық суў спорты түрлери бойынша қәнигелестирилген спорт мектебиниң балалар жүзиў бассейнинде биринши мәрте спорттың Пара жүзиў түри бойынша ер балалар хәм қыз балалар ортасында Қарақалпақстан Республикасы Кубогы өткерилди.
Оған Нөкис қаласы ҳәм басқа да районлардан спортшылар қатнасты. Жарыс қызғын ҳәм бәсекиге толы болды. Онда түрли жас категориялары бойынша қызлар арасында Абиллаева Шахзада, Қалилаева Турсынай, Реймова Асель, Ережепбаева Шахнозалар сыйлы биринши орынды ийеледи. Ал, ер балалар арасында Жанназаров Азимжан, Реймбаев Ринат, Шаниязов Айтуўған, Реймов Гафур, Худияров Саламатлар сыйлы биринши орынға мүнәсип деп табылды. Спортшыларды тренер Азамат Ильясов ҳәм Әдилбек Кеңесбаевлар таярлады.
Жарыс республикалық суў спорты түрлери бойынша қәнигелестирилген спорт мектеби, Қарақалпақстан Республикасы спортты раўажландырыў министрлиги, Өзбекстан Миллий Паралимпия комитети Қарақалпақстан Республикасы бөлими тәрепинен шөлкемлестирилди.
Соны айрықша атап өтиў керек, суў спорты түри бойынша паралимпия жарысы Қарақалпақстан Республикасында биринши мәрте өткерилмекте. Бундай жарыслар физикалық имканияты шекленген инсанларға өзлерин спорт тараўында сынап көриўине және бир имканият есигин ашады.
Шахноза-Бану Абдуллаева,
Karinform.uz
