Өзбекистан ҳәм Қазақстан жоқары мағлыўматлы кадрлардың дипломларын тән алыў бойынша келисимге еристи

Өзбекистанның жоқары оқыў орынларының қәнигелери Қазақстанның билимлендириў мәкемелери менен бирге ислесиўге тайын. Бул ҳаққында Өзбекистан Республикасы Жоқары ҳәм орта арнаўлы билимлендириў министри Ином Мажидов Қазақстанның Өзбекистандағы айрықша ҳәм тең ҳуқықлы елшиси Ерик Өтембаев пенен болған ушырасыўында айтып өтти, деп хабар бермекте Baq басылымы.
Еки мәмлекет те нефть химиясы ҳәм аграр секторда жумыс ислейтуғын жоқары билимли маман кадрларды таярлаўға дыққат аўдармақта. Бул тийкарда, тек ғана жасларды оқытып қоймай, профессор-оқытыўшылар арасында байланыс ҳәм бирге ислесиўди күшейтиў нәзерде тутылған. Қазақстандағы жоқары оқыў орынлары базаларының биринде технопарк қурылады. Сондай-ақ, биргеликте дипломларды еки мәмлекет аймағында да әмел етилиў тәртиби жеңиллестириледи.
- Дипломларды тән алыўдың, ностратификациялаўдың стандарт илажлары бар. Бул мәселеде көп қыйыншылықлар болмайды. Қазақстан ҳәм Өзбекистан оқыў орынларында билим алып атырғанларды жумыс пенен тәмийинлеўде қыйыншылық болмайды, - деп айтып өткен Ином Мажидов.
Ҳәзирдиң өзинде шама менен 20 ға шамалас илимий мәкемелер бирге ислесиў бойынша келисимлер қабыл етти. Жақын аралықта еки мәмлекет жоқары оқыў орынларының информациялық орталығы ашылыўы режелестирилген.

Ислам Матеков.