Хабарыңыз бар, Karinform.uz сайтында «ПОРТАЛ керек пе ямаса ЖУРНАЛИСТ? ямаса журналистиканың төртинши ҳәкимият сыпатындағы орны қайда қалды?» атамасындағы мақала жәрияланған еди. Бул мақаламыз сайттың Фейсбук социаллық тармағындағы группасында көплеген «Like»ларды жыйнады ҳәм пайдаланыўшылар тәрепинен көплеген комментарийлер жазылды. Биз журналист сыпатында жазған мақаламыз итибардан шетте қалмай, адамлардың талқылаўына себеп болып, журналистлердиң және бир мәрте қәлем услаўына түртки болып атырғанлығынан жүдә қуўанышлымыз. Қуўанышлы тәрепи, бизиң бул мақаламыздан соң белгили журналист Арыўхан Турекееваның республикалық «Қарақалпақстан жаслары» газетасының 2018-жыл 8-февральдағы №6 (7970) санының 4-бетинде «Журналистиканың бүгинги машқалалары яки мүлгиген журналистлерди оятың…» атамасындағы мақаласы жәрияланды. Бул мақалада сайтымызда жәрияланған мақала келтирип өтилген ҳәм оған қосымша ретинде журналист өзин қыйнап жүрген машқалаларды да қоса сөз еткен.
Ҳақыйқатын айтыў керек, Қарақалпақстанда журналистлердиң көпшилиги соңғы техника-технологиялардан пайдала алмайды, Интернетке кирмейди, социаллық тармақларға «басын тығып» та қарамайды. Бул гәпти жазыў бизге жүдә қыйын. Кәсибимизге ҳәм кәсиплеслеримизге болған меҳир-муҳаббатымыз себепли болса керек, қолларымыз клавиатураның үстинде ҳәриплерди таўа алмай алжасады, кеўилимиз өзимизге қарсы шығады. Устазларымыздың «журналист ҳәр қандай жағдайда да нейтрал болыўы ҳәм ҳәрдайым ҳақыйқатты жазыўы керек» деген гәплерин қыялымыздан өткерип, бул ашшы ҳақыйқатты, яғный айрым журналистлердиң заман талапларына «жуўап бермейтуғынлығын» тән аламыз.
Усындай журналистлердиң арасынан ажыралып шыққан Арыўхан Турекееваға заманагөй техника-технологияны түсингенлиги, зийреклиги ҳәм оперативлиги ушын миннетдаршылық билдиремиз.
Сахибжамал Есемуратова
