Журналистлик жумыс «копировать и вставить» дегени емес…

Facebook социаллық тармағында Өзбекистан миллий мәлимлеме агентлиги – ӨзАда жәрияланған журналистлик материаллардың айрымларына пайдаланыўшылар өзлериниң пикирлерин билдирип өтпекте. Олардың көпшилиги «Журналистлеримиз деп мақтаныш ете бериң, әпиўайы ғана «копировать и вставить» етемиз, болғаны» мазмунындағы пикирлерден ибарат. Хош, халықтың бундай пикирге келиўине не түртки болды?
Агентлик сайтында жәрияланған еки түрли атамадағы материалда бирдей гәплердиң болыўы, ондағы тек ғана адам атларының өзгергени бүгинги зийрек оқыўшылардың итибарынан шетте қалмады. Социаллық тармаққа олар усы материаллардың сүўретин де жәриялады.


Бирақ, айрымлар сыяқлы бизлер де буған оншелли исениңкиремей, агентлик сайтына кирип көрдик ҳәм тилекке қарсы, пайдаланыўшылардың пикирлери дурыс екенлигиниң гүўасы болдық. Мине, оның дәлили.



Биз, журналистлер, қыйыннан қыйыстырып, жәмийеттиң арасына кирип барып, олардың машқалаларын, тилек-өтинишлерин көтерип шығыўды ойламай, журналистлик этиканы сақламастан, көширип алыўға жол қоя берер екенбиз, халық ҳешқашан бизлерге исенбейди. Олай болса «төртинши ҳәкимият» түсиниги абсурдлыққа айланады.

Ислам Матеков ҳәм Сахибжамал Есемуратова.