Усы жылдың 28-март сәнесинде Бердақ атындағы Қарақалпақ мәмлекетлик университети журналистика кафедрасында Қанлыкөл районы ҳәкиминиң орынбасары журналистика қәнигелигиниң студентлери менен ушырасыў кешесин өткерди.
Ушырасыўды кафедра баслығы ф.и.к. Злиха Оразымбетова алып барды. Қанлыкөл районы ҳәкиминиң орынбасары Абдикаримов Қуралбай Орынбаевич райондағы социаллық ҳәм экономикалық бағдарда алып барылып атырған жумыслар ҳаққында баянат жасады.
Ушырасыўда Қуралбай Орынбаевич бир жағын ана Әмиўимиздиң қәсийетли ылай суўы қырып ағып, бир тәрепи аты тарийхқа айланған Мамыйдың кең даласы менен ушласқан Қанлыкөл туўралы сөз етти. Сондай-ақ, районда әмелге асырылып атырған илажлар ҳәм перспективалы режелери ҳаққында да айтып өтти. Әсиресе, Қанлыкөл районы ҳәкимлигиниң qonlikol.rk.uz рәсмий веб сайты, http://kanews.uz жаңалықлар порталы ҳәм http://business-portal.uz инвестициялық порталы туўралы журналистика қәнигелигиниң студентлерине түсиник берип өтти. Район ҳәкиминиң орынбасары журналистика қәнигелигиниң студентлерин келешекте бирге ислесиўге шақырды.
Мағлыўмат ушын, жақын күнлерде журналистика қәнигелигиниң студентлерине Қанлыкөл районына медиатур шөлкемлестирилиўи режелестирилди.
Сахибжамал Есемуратова
