Ең күшли армиялар рейтинги. Өзбекстан нешинши орында?

Өзбекстан Қураллы Күшлери 2018-жылы дүньяның ең күшли армиялары рейтингинде 9 текше жоқарылап, 39-орынды ийеледи, деп хабар бермекте Daryo.uz сайты.
Global Firepower тәрепинен дүзилген рейтингде 136 мәмлекеттиң қураллы күшлери қатнасқан. Бул мәмлекетлердиң қураллы күшлери 50 ден аслам көрсеткишлерине қарай баҳа берилген. Атап айтқанда, қурғақлықтағы әскерий күшлердиң дәрежеси, әскерий ҳаўа күшлериниң дарежеси, теңиз күшлериниң қүдирети, әскерий техника ҳәм әскерий хызметке миннетли халықтың саны, әскерий сектордың қаржыландырылыўы, мәмлекетте жанар май дәреклериниң болыўы, транспорт инфраструктурасының раўажланғанлығы ҳәм басқа көрсеткишлер.
Атап көрсетилиўинше, бүгинги күнде Өзбекстан Қураллы Күшлериниң ықтыярында 420 танк, 179 самолёт, 715 әскерий машина, 143 өзи ҳәрекетленетуғын топ, 880 топ ҳәм 109 жалпыламай оқ атыў қураллары бар.
ҒМДА еллери арасында Өзбекстан қураллы күшлери Россия ҳәм Украинадан кейинги үшинши орынды ийелеп тур. Беларусь – 41, Қазақстан – 50, Әзербайжан – 53-орынларды ийелеген.
Рейтингниң ең жоқары текшесинде АҚШ (1), Россия (2), Қытай (3), Ҳиндстан (4), Франция (5), Британия (6), Қубла Корея (7), Япония (8), Туркия (9), Германия (10) ҳәм басқа мәмлекетлер жайласқан.

Сайтымыздың телеграмдағы каналына ағза болың: https://t.me/karinformuz

Ислам Матеков.