![](\"http://img.uz/d/2017/08/5991843f13a73.jpg\")
Мадридтиң «Реал» клубының ҳүжимшиси Криштиану Рональду «Барселона»ға қарсы ойында (3:1) қызыл карточкаға ылайықлы деп табылды. Ойында төрешилик еткен Рикардо Де Бургос Бенгоэчеа Рональдуге голды байрамлап атырған ўақытта футболкасын шешкени ҳәм қарсыласының жәрийма майданшасында симуляция еткени ушын еки мәрте сары карточка көрсетти. Екинши сары карточка көрсетилген ўақытта өзин тутып тура алмаған Рональду төрешини түртип жиберди. Мағлыўматларға қарағанда, Испания футбол федерациясы португалиялы футболшыны спортшыларға жараспайтуғын ҳәрекетлери ушын узақ мүддетке ойынлардан шетлетиўи мүмкин. Дисквалификация мүддети 4 ойыннан 12 ойынға шекем болыўы мүмкин. Бирақ, оның алдағы болатуғын 4 ойын, яғный: «Барселона»ға қарсы жуўап ойыны ҳәм Испания Ла Лигасының «Депортиво», «Валенсия», «Леванте»ге қарсы ушырасыўларында командасына жәрдем бере алмайтуғыны анық болып турыпты.
Ислам Матеков.
