![](\"http://img.uz/d/2019/01/5c385c3ed6585.jpg\")
Әжинияз атындағы Нөкис мәмлекетлик педагогикалық институты профессор-оқытыўшылары арасында спорттың мини футбол түри бойынша спорт жарысы болып өтти.
«Әскерий ўатансүйиўшилик айлығы», Өзбекстан Қураллы Күшлери дүзилгениниң 27 жыллығы ҳәм «14-январь – Ўатан қорғаўшылары күни» байрамы мүнәсибети менен шөлкемлестирилген жарыста институттың барлық факультетлери ҳәм ректорат командалары қатнасты.
Жарыс жуўмақларына бола, барлық қарсыласларынан үстин келген дене мәденияты факультети командасы 1-орынды, математика-информатика факультети командасы 2-орынды ҳәм тарийх-география факультети командасы 3-орынды ийеледи.
![](\"http://img.uz/d/2019/01/5c385c5d92285.jpg\")
- Бос ўақтымызда спорт ҳәм саламатлық илажларына қатнасыў ҳәр биримиздиң беккем денсаўлығымыздың гиреўи болып табылады, - дейди институт дене мәденияты факультети декан орынбасары Қулмурат Кенжебаев. – Институт профессор-оқытыўшылары ҳәм студент-жаслары арасында усындай беллесиўлер турақлы өткерилип келинеди. Соның нәтийжесинде, институт жаслары спорт тараўында да республикада жетекшилерден есапланады.
![](\"http://img.uz/d/2019/01/5c385c7e30e98.jpg\")
Жеңимпазлар ҳәм сыйлы орын ийелери институт ректораты, спорт клубы ҳәм кәсиплик аўқамы тәрепинен таярланған диплом ҳәм естелик саўғалары менен сыйлықланды.
Ислам Матеков.
Сайтымыздың телеграмдағы каналына ағза болың: https://t.me/karinformuz
