Ойыншық кеме Шотландиядан Африкаға шекем жүзип барады

Шотландияның Абердиншир деген жеринде жасайтуғын Фергюсонлар шаңарағы, яғный шаңарақ басшысы Макнил менен оның 8 жаслы Олли ҳәм 5 жаслы Гарри исимли балалары теңизге ойыншық кеме жиберген.



Дәслеп олар кемени жақсылап ислеп шыққан ҳәм оған Adventure деп ат берген. Олар кемени усы жылдың май айында теңизге жиберген. Фергюсонлар кемениң жолында ушырасқан адамларға арнап хат та жазған. Онда Олли менен Гарри Adventure кемесин көрген адамлардан мағлыўмат бериўди өтиниш еткен.



Олардың өтиниши орынланды. Ҳәзирде кеме 630 километр жүзип, Дания жағалаўларына жеткен. Бул ҳаққында кемени көрген адамлар хабар берген. Кейин кемени Швеция жағалаўларында бир ҳаял таўып алған. Ол Фергюсонларға кемениң шақаларға илинип қалғанын айтып, кейин оны оңлап, теңизге жибергенин жазып жиберген. Кеме соңынан Норвегияға жеткен. Ол жердеги ҒХҚлар «Арқа теңизди жүзип өткен кеме» атамасында мақалалар жәриялаған.



Ойыншық кеме буннан соң теңизде «Кристиан Радич» кемеси менен дусласып, борт қурамындағылардың берген мағлыўматы бойынша, Adventure олар менен бирге Африка жағалаўларына жүзип баратыр екен. Борт ағзалары ойыншық кемени Жасыл боб деген жерде теңизге жибереди ҳәм ол Атлантика океаны арқалы жүзип кетеди.

Ислам МАТЕКОВ.