«Қуўнақлар ҳәм зийреклер» таңлаўының Қарақалпақстан басқышы қашан болып өтеди?

Өзбекстан Республикасы Жоқары ҳәм орта арнаўлы билимлендириў министрлиги ҳәм Өзбекстан жаслар аўқамы «Зўр ТВ» каналы менен биргеликте ҳәр жылы жоқары оқыў орынлары студентлери арасында «Қуўнақлар ҳәм зийреклер» таңлаўын өткерип келмекте.
Быйылғы жылдағы аймақлық басқышлар кестесине муўапық, Қарақалпақстан Республикасында усы жылдың 30-апрель күни саат 15:00 де Нөкис қаласында таңлаўдың аймақлық басқышы болып өтеди.

Оған Қарақалпақ мәмлекетлик университетиниң «Жайҳун», Нөкис мәмлекетлик педагогикалық институтының «Туран», Ташкент информациялық технологиялар университети Нөкис филиалының «ТАТУ», Өзбекстан мәмлекетлик көркем өнер ҳәм мәденият институты Нөкис филиалының «Пегас шоу», сондай-ақ, таңлаўдың аймақлық басқышында биринши мәрте Өзбекстан-Қубла Корея қоспа кәрханасының «Үстирт жулдызлары» командалары қатнасады.
Таңлаўдың аймақлық басқышы анық қай жерде өткерилиўи ҳаққында ҳәзирше мағлыўматлар жоқ.
Мағлыўмат ушын, таңлаўдың өткен жылдағы мәўсиминде Нөкис мәмлекетлик педагогикалық институтының «Туран» командасы финал басқышына шекем жетип барып, сыйлы 2-орынды қолға киргизген еди.

Ислам Матеков.

Сайтымыздың телеграмдағы каналына ағза болың: https://t.me/karinformuz