Португалия сайланды командасы менен Мадридтиң «Реал» клубы ҳүжимшиси Криштиану Рональду 2016-2017-жылдағы футбол мәўсиминиң ең жақсы футболшысы деп табылды. Футболшы Монакода болып өткен Чемпионлар лигасына чек таслаў салтанатында сыйлықланды. Рональду өткен мәўсимди табыслы өткерди. Чемпионлар лигасын қатарасына екинши мәрте жеңип алды. Испания Премьеросында командасын алға жетеледи. Ол Европаның ең жақсы футболшысы болып ғана қалмай, ең жақсы ҳүжимши атағына да мүнәсип деп табылды.
Сондай-ақ, өткен мәўсимниң ең жақсы дәрўазаманы атағы Джанлуиджи Буффон, ең жақсы қорғаўшы атағы Серхио Рамос, ең жақсы ярым қорғаўшы атағы Лука Модричке несип етти.
Қызлар арасында Лик Мартенс ең жақсы деп табылды.
Ең жақсы футболшылар Чемпионлар лигасына қатнасатуғын командалардың ықласбентлери ҳәм УЕФА қурамына киретуғын 52 ағзаның даўыс бериў жолы менен анықланған.
Ислам Матеков.
